Kuku Joshua Shiimi (87) nomukulukadhi gwe kuku Martha Nangombe (68), okwa li ya lopota omutekulu gwawo gwomimvo 19 kutya okwa li teya ningile omatilitho gokuya kutha omwenyo molwashoka anuwa otaye mu logo, ashike oshiningwanima shoka kasha li nande sha yapukilwa.
Kuku Nangombe okwa li a shuna ko kopolisi opo a ninge eindilo lyokugamenwa koveta, ashike aakulupe mboka oya dhipagwa omanga egamenenopo ndyoka inaali tulwa miilonga.
Aakulupe mboka oya hulitha sho ya tetwagulwa sigo omeso pegumbo lyawo tali adhika momukunda Oniiha B moshitopolwa shaShikoto momasiku 3 gaNovemba omumvo gwa zi ko.
Omidhimba dhawo okwa li dhi itsuwika kokanona komondondo ontiyali.
Kuku Shiimi okwa li a posipala nokwa li a tsuwa negonga.
Moshiningwanima sha faathana, aakulupe yalwe yaali okwa li ya hendagulwa sigo omeso komutekulu gwawo gwomumati moshitopolwa shaKavango Uuninginino momasiku 11 Juli omumvo gwa zi ko sho teya tamenekele uulodhi.
Omuwiliki gwombelewa yuuthemba womuntu Basilius Dyakugha okwa popi kutya iipotha mbyoka oyo yimwe iipe mbyoka ya yakulwa kombelewa ye.
Okwa popi kutya aakulupe osho wo aantu mboka ye li momaluhepo oyo unene haya ningi iihakanwa yokulundililwa uulodhi molwashoka olundji ihaya vulu okwiipopila nenge okwiigamena yoyene.
Okwa popi kutya omalundilo guulodhi ohaga nyatekitha omadhina gaantu mboka taya lundilwa.
Ombelewa yuuthemba womuntu oya popi kutya konyala aakulupe ya konda pomugoyi oya dhipagwa moNamibia pokati komumvo 2009 no2025 taya lundilwa uulodhi.
Dyakugha okwa popi kutya iipotha mbyoka omwa kwatelwa shomukulupe gwomoshitopolwa shaKavango Uuninginino ngoka kwa li ikutha omwenyo mo2019 omolwohoni yokuulwa omulodhi.
